الضحيه
البنت اللي قدامك دي اتعذبت بأبشع الطرق وأضربت بخشبة كلها مسامير ومفك على راسها وأطرافها وكل حتى في جسمها بعدين موتوها، واللي عمل فيها كل دة كان جوزها وحماها😱😢
آيات الرفاعي بنت سورية صغيرة، لسه ما كملتش 16 سنة
آيات من صغرها وهي كانت معروفة بجمالها وأخلاقها
كانت زي أي بنت، كان المفروض تعيش طفولتها، تخرج، تضحك، وتحلم، لكن للأسف حياتها خدت طريق تاني خالص.
اتقدملها عرسان كتير وهيا لسه صغيرة، وفي وسط العرسان دي كان في شاب اسمه غياث، كان ضابط في الجيش
أمه شافت في آيات مش بس عروسة لابنها، لأ دا شافت فيها خدامة تقدر تشكلها على مزاجها زي ما هيا عايزة
أبو ايات وافق مكنش مقتنع اوي، لكن تحت ضغط العادات والتقليد اللي بتقول جواز البنت بدري ستر ليها والكلام اللي زي كدة
ومن هنا بدأت الكارثة…..
آيات اتجوزت ودخلت بيت جوزها في بيت عيلة، فيه جوزها وأهله وإخواته، البيت كان يبان من برة عادي زي اي بيت لكن الحقيقة ان ايات كانت عايشة في جحيم حرفياً…
بعد 10 أيام بس من جوزها بدأ المعاناة
ضرب، وإهانة، وشغل طول اليوم، وخدمة لكل اللي في البيت
مافيش راحة ولا احترام ، ومافيش حتى إحساس إنها بني آدمة.
كانت بتسكت و تخبي الضرب عن أهلها، وكانت خايفة من انها تطلق
لدرجة ان رجلها اتكسرت و مفكروش حتى ياخدوها لدكتور يشوفها
لفوا رجلها بطريقة بدائية، وسابوها تتعافى لوحدها وفوق دا كله كانت بتخدمهم وهي بتعرج!
وده كان مجرد بداية.
اكتشفت بعد كده إن جوزها على علاقة ببنت خالته
وكان بيجيبها البيت يقعد معاها قدامها عادي جدًا، كأن آيات مش موجودة!
والأصعب؟
حماتها كانت عارفة وبتشجعه على كدة كمان
وضغطت على آيات تقبل إنه يتجوز التانية، عشان يصلّح غلطته بعد ما حملت منه!
وكانت بتقعد تعايرها وتقولها ان بنت خالته احسن منها
حتى وهي حامل ما سابوهاش في حالها، اتضربت لدرجة إنها نزفت نزيف شديد جداً
وخبّوها في أوضة وقالوا لأهلها إن الحمل صعب، عشان يخفوا آثار الضرب ومحدش يلاحظ من اهلها…
مش بس كده ده حرموها حتى من حضن بنتها الرضيعة "لينا" كنوع من أنواع العقاب ليها!
وهنا بصراحة أنا مش فاهم هما بيعقبوها على ايه ؟ هي اقترفت إيه أصلا 😢
لحد ما وصلنا لأسوأ لحظة في القصة…
أول يوم في سنة 2022.
ايات مكنتش عارفة فين مكان إبريق المايه
السبب كان تافه جدا بس نهايته كانت مأساوية لأقصي درجة…
الحما اعترف بعد كده إنه مضربش ايات بعصاية بس، لا ده استخدم مفك وخشبة كان حاتط فيها مسامير!
وفضل يضرب فيها بكل وحشية في جسمها وعلى راسها وأطرافها بدون اي رحمة
وبعد كدة دخل جوزها وكمل عليها، وخبط دماغها في الحيطة كذا مرة لحد ما فقدت الوعي…
وسابوها…
كانوا سايبينها بتموت بالساعات وهم قاعدين بيتفرجوا!
لا إسعاف ولا محاولة إنقاذ ولا في أي رحمة اساساً…
وبعد ما ايات فارقت الحياة حاولوا يخفوا الجريمة…
حطوا أكل مهروس وسوايل على هدومها وبوئها وقالوا إنها اتسممت ورجعت وبعدين وقعت من على السلم.
لكن أبوها لما شافها في المستشفى عرف ان بنته مامتش طبيعي
جسمها كله كان مليان جروح وكدمات حتى رجليها من تحت!
الحقيقة بدأت تظهر…
بس بدل ما يخافوا، أخو جوزها راح هدد ابوها وأهلها مستغل مكانته اخوه الظابط، وقالهم هولع في البيت باللي فيه لو ما سكتوش!
لكن المرة دي آيات صوتها وصل، ولاكن للاسف بعد ما فارقت الحياة
وصل عن طريق رسايل كانت بتبعتها لاختها، وشهادة أختها طبعاً
القضية وقتها انتشرت في سوريا كلها وبقت قضية رأي عام.
وفي الآخر المحنكة اصدرت الحكم سنة 2023:
الزوج وأبوه 7 سنين بس
وأخوه سنة واحدة
7 سنين بس مقابل كل ده!
آيات ماتت وسابت وراها طفلة رضيعة، وأب عايش بالندم.
والسؤال اللي بيوجع بجد…
مين القا.تل الحقيقي؟
هل ابوها واهلها اللي جوزوها في السن دا وللشخص دا؟
ولا العادات والتقليد اللي خلت بنت صغيرة تتجوز بدري وتدفع التمن حياتها ؟
القصة دي مش مجرد جريمة، دي عن واقع موجود وقرارات ممكن تدمر حياة كاملة.
ولو في حاجة تتقال في النهاية…
فهي إن السكوت أوقات بيبقى أخطر من الجريمة نفسها
قصة حقيقية
---النهاية